ALİ MƏKTƏBLƏR
Lənkəran Dövlət Universiteti (LDU) 1991-ci ildə Bakı Dövlət Universitetinin filialı, 1992-ci ildən isə müstəqil Dövlət Universiteti kimi fəaliyyət göstərir. Universitetdə 4 fakültə (Humanitar, İqtisadiyyat və idarəetmə, Təbiyyat, Aqrar və mühəndislik), 13 kafedra vardır.
"Təbiyyat" fakültəsində "Riyaziyyat və informatika müəllimliyi", "Kimya və biologiya müəllimliyi", "Tarix və coğrafiya müəllimliyi" "Kompüter elmləri" və "Ekologiya" ixtisasları üzrə;
"Aqrar və mühəndislik" fakültəsində "Kompüter mühəndisliyi", Qida məhsulları mühəndisliyi", "Ekologiya mühəndisliyi", "Torpaqşünaslıq və aqrokimya", "Aqronomluq", "Baytarlıq", və "Meşəçilik"ixtisasları üzrə;
"Humanitar" fakültədə "Azərbaycan dili və ədəbiyyatı müəllimliyi", "Xarici dil müəllimliyi (ingilis dili üzrə)", "İbtidai sinif müəllimliyi", "Məktəbəqədər təlim və tərbiyə", "Tərcümə (ingilis dili üzrə)", "Təhsildə sosial-psixoloji xidmət", "Müzeyşünaslıq, arxiv işi və abidələrin qorunması" və ""Aktyor sənəti" ixtisasları üzrə;
"İqtisadiyyat və idarəetmə" fakültəsində "Mühasibat uçotu və audit", "Maliyyə", "İqtisadiyyat", "Biznesin idarə edilməsi" və "Turizm və otelçilik" ixtisasları üzrə mütəxəssislər hazırlanır.
Universitetdə respublikanın bütün bölgələrindən və xarici ölkələrdən olan bakalavriat səviyyədə 25 ixtisas üzrə 2800-ə qədər tələbə, magistratura səviyyəsində 21 ixtisaslaşma üzrə 100-ə qədər magistrant təhsil alır. Tələbələrin təlim-tərbiyəsi ilə 150-yə yaxın professor-müəllim heyəti məşğul olur ki, onlardan da 8 nəfəri elmlər doktoru-professor, 70 nəfəri fəlsəfə doktoru-dosent və qalanları isə baş müəllim və müəllimdir. LDU-da elmin əsas sahələri üzrə doktorantura və dissertantura fəaliyyət göstərir. Universitetdə ardıcıl elmi seminarlar, diskussiyalar, debatlar, görkəmli elm, mədəniyyət, incəsənət xadimləri və ziyalılarla görüşlər təşkil olunur, idman yarışları keçirilir.
Universitet dünyanın bir sıra qabaqcıl ali məktəbləri ilə təhsil, elm və mədəniyyət sahələrində sıx əməkdaşlıq edir. Belə ki, LDU Xəzəryanı Ölkələrin Universitetləri Assosiasiyasının üzvüdür və Rusiya Federasiyasının Samara Dövlət Universiteti, Ural Dövlət Aqrar Üniversiteti, Başqır Dövlət Aqrar Üniversiteti, Puşin Dövlət Təbiyyat Elmləri İnstitu, Başqır Dövlət Üniversiteti ilə Türkiyənin Avrasiya Universiteti, İqdır Universiteti, Sinop Universiteti, Kocaeli Universiteti, Artvin Coruh Universiteti, Kastomonu Universiteti, Sakarya Universiteti, Üsküdar Universiteti, Atılım Universiteti, Bülent Ecevit Universiteti, Yalova Universiteti, Kars Universiteti ilə Belorusiyanın Belarus DÖvlət Aqrar Texniki Universiteti ilə, Moldovanın Moldova Azad Beynəlxalq Universiteti, Polşanın Bıdqoş İqtisadiyyat Universiteti ilə, Ukraynanın Xarkov Milli Radioelektronika Universiteti, Poltava İqtisadiyyat və Ticarət Universiteti ilə, Macarıstanın Kapoşvar Universiteti ilə çoxtərəfli əməkdaşlıq müqavilələri vardır.
Universitetdə kadr hazırlığının keyfiyyətini yüksəltmək, xüsusilə müəllim hazırlığının səviyyəsini artırmaq məqsədilə müasir tələblərə cavab verən yeni 2 informatika kabineti, 1 coğrafiya və 1 tarix kabineti, tərcümə proqramları ilə təmin olunmuş 1 linqafon kabineti, 1 baytarlıq kabineti və 2 oxu zalı müəllim və tələbələrin istifadəsinə verilmişdir. Eyni zamanda Almaniya istehsalı olan 2 yeni kimya və biologiya tədris laboratiyası alınmışdır və tələbələrin istifadəsinə verilmişdir. Bu laboratoriyaların yaradılmasında məqsəd orta məktəbdə gələcək tədrislə məşğul olacaq müəllimlərin biologiya və kimya fənnlərinə aid laboratoriya işlərini daha mükəmməl səviyyədə tədris etməyinə kömək etməkdir. Həm biologiya həm də kimyada müxtəlif siniflərdə tədris olunacaq laboratoriya işlərinin öyrədilməsi müasir standartlara cavab verən tədris avadanlıqları ilə aparılır.
Azərbaycan Respublikası Prezidentinin 19 yanvar 2015-ci il tarixli Sərəncamı ilə təsdiq edilmiş "Azərbaycan Respublikasında təhsilin inkişafı üzrə Dövlət Strategiyası"nın həyata keçirilməsi ilə bağlı Fəaliyyət Planının 2-ci bəndinə əsasən professor-müəllim heyətinin mobilliyini təmin etmək məqsədilə LDU-da hər birinin sahəsi 50,5 m2 olmaqla ümumi sahəsi 360 m2 təşkil edən, müasir tələblərə cavab verən 6 ikiotaqlı xidməti mənzil inşa edilmiş və müəllimlərin istifadəsinə verilmişdir.
Həmçinin mütəxəssis hazırlığının keyfiyyətinin yüksəldilməsi, tədris prosesində müasir informasiya-kommunikasiya texnologiyalarının tətbiqi, təhsilalanların və təhsilverənlərin kitabxana və biblioqrafiya-məlumat xidmətləri ilə təminatını həyata keçirmək məqsədilə İnformasiya kommunikasiya və kitabxana mərkəzi və bu mərkəzin daxilində 2 bölmə - "İnformasiya kommunikasiya və kommunikasiya" və "Kitabxana" bölmələri yaradılmışdır. Elektron Universitet layihəsinə start verilərək LDU-nun İnformasiya kommunikasiya və kitabxana mərkəzinin əməkdaşları - təcrübəli mütəxəssislər tərəfindən hazırlanmış və onun mərhələlərlə tətbiqi nəzərdə tutulmuşdur. Layihələndirmə ərəfəsində Azərbaycan ali məktəblərində tətbiq edilmiş uyğun sistemlər, onların imkanları, texniki təminatı öyrənilmiş, həmin universitetlərin əməkdaşları, bu sferada çalışan layihə rəhbərləri və proqramçılarla təcrübə mübadiləsi aprılmışdır.
LDU-da bakalavriat və magistratura səviyyələrində son ildə əlavə olaraq regionun sosial-iqtisadi inkişaf prespektivlərini nəzərə almaqla kənd təsərrüfatı yönümlü bir sıra ixtisas və ixtisaslaşmalar üzrə kadr hazırlığı aparılmaqdadır. Bununla əlaqədar LDU-nun yardımçı təcrübə təsərrüdatı üçün 7,5 hektar ayrılmışdır. Təcrübə sahəsində istilikxana salınmış və bir sıra bitkilər becərilmişdir. Həmçinin Cənub bölgəsi üçün spesifik olan sitrus bitkilər və çay bitkisi əkilmişdir.
Universitet təkcə elmi-praktik konfransların deyil, eyni zamanda ictimai-siyasi və mədəni-kütləvi tədbirlərin də təşəbbüskarı və təşkilatçısıdır. Universitetdə Heydər Əliyev muzeyi və idarəçilik məktəbi fəaliyyət göstərir. Bu ideoloji mərkəzdə hər ay müxtəlif mövzularda məşğələlər keçirilir. Universitetdə elmin müxtəlif sahələri və aktual problemləri üzrə hərtərəfli tədqiqat işi aparılır, “Lənkəran Dövlət Universitetinin xəbərləri” adlı 2 seriyalı (humanitar və təbiət) elmi məcmuə , "Elmi Konfrans materialları" adı ilə jurnallar nəşr edilir.
Heydər Əliyev Dövlət İdarəçiliyi Universiteti 4 may 2005-ci ildən Lənkəran şəhərində fəaliyyət göstərir. Azərbaycanın dünya şöhrətli siyasi və dövlət xadimi Heydər Əliyevin zəngin irsini təbdiğ etmək, kadrları bu irsə sədaqət ruhunda formalaşdırmaq Universitetin fəaliyyət konsepsiyasını təşkil edir.
Müdavimlər "Heydər Əliyevin Dövlət İdarəçiliyi", "Heydər Əliyev və Azərbaycan Dövlətçiliyi", "Heydər Əliyev və Azərbaycanda Dövlət Qulluğunun formalaşması", "Elmin, təhsilin inkişafı və Milli kadr hazırlığı H.Əliyevin həyat amalıdır", "Heydər Əliyevin Azərbaycanın sosial-iqtisadi inkişafında rolu", "Azərbaycançılıq ideologiyasının formalaşmasında və inkişafında Heydər Əliyevin rolu", "Heydər Əliyev və Lənkəran", "Heydər Əliyev və Azərbaycanda hüquqi-demokratik islahatlar", "Dövlət hakimiyyəti orqanlarında, idarə, müəssisə və təşkilatlarda kargüzarlıq işinin təlimati qaydalara uyğun aparılması" mövzularında mühazirələr dinləmişlər.
Məşğələləri Azərbaycan Respublikası Prezidentinin yanında Dövlət İdarəçilik Akademiyasının rektoru Seyfəddin Qəndilov, Prezidentin Milli Məsələlər üzrə müşaviri Hidayət Orucov, Azərbaycan Respublikası Prezidenti yanında Dövlət İdarəçilik Akademiyasının I prorektoru Əlikram Abdullayev, Respublika Təhsil şurasının sədri Əjdər Ağayev, Azərbaycan Respublikası Milli Məclisinin Sosial Siyasət Daimi Komissiyasının sədri Hadı Rəcəbli, Azərbaycan Respublikası Milli Məclisinin regional məsələlər daimi Komissiyasının sədri Zahid Qaralov, Respublika Prokurorluğunun idarə rəisi Eldar Əfəndiyev aparmışlar.
