Vətən müharibəsi şəhidləri Mirməhəmmədəli Rzazadə və Qüdrət Məmmədzadənin anım mərasimləri keçirilib

      Oktyabrın 17-də Vətən müharibəsi şəhidləri Rzazadə Mirməhəmmədəli Tərlan oğlunun və Məmmədzadə Qüdrət Tofiq oğlunun məzarları ziyarət olunub. Lənkəran Şəhər İcra Hakimiyyətinin başçısı Taleh Qaraşovun, icra aparatının məsul şəxslərinin, şəhidlərin ailə üzvlərinin və  ictimaiyyət nümayəndələrinin iştirakı ilə Şiləvar və Sütəmurdov kənd qəbiristanlıqlarında dəfn olunan bütün şəhidlərimizin məzarları önünə gül dəstələri düzlüb, ruhlarına dualar edilib. Lənkəran ŞİH-nin başçısı Taleh Qaraşov hər zaman olduğu kimi şəhid ailələrinə xüsusi diqqət və qayğıyla yanaşaraq onlarla səmimi söhbət edib. Taleh Qaraşov bildirib ki, torpaqlarımızın azad olunmasına, suveren hüquqlarımızın bərpasına və sərhədlərimizə tam nəzarət edə bildiyimizə görə şəhidlərimizə borcluyuq. Bir ailənin övladı kimi Vətənin müdafiəsinə qalxan övladlarımız bütün xalqın övladı, əzizi kimi daim qəlblərdə yaşayacaqlar. Şəhid ailələri də öz növbələrində icra başçısının diqqət və qayğısından məmnunluqlarını ifadə ediblər.

      Qeyd edək ki, Rzazadə Mirməhəmmədəli Tərlan oğlu Ali Baş Komandan İlham Əliyev tərəfindən ölümündən sonra “Vətən uğrunda”, “Cəsur döyüşçü”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.

     Şəhidimiz Q.Məmmədzadə də döyüşlərdə göstərdiyi igidlik və şücaətə görə ölümündən sonra Azərbaycan Respublikası Prezidentinin müvafiq sərəncamları ilə “Vətən uğrunda”, “Cəsur döyüşçü” və “Suqovuşanın azad olunmasına görə” medalları ilə təltif olunub.

        Allah rəhmət eləsin!