Taleh Qaraşov Lənkəranın kanalizasiya sisteminin yenilənməsi işləri ilə yerində tanış olub
Lənkəran rayonunun infrastrukturunda əsas prioritetlərdən sayılan kanalizasiya sisteminin köklü modernləşdirilməsi layihəsinin icrasına start verilib. Azərbaycan Respublikasının Prezidenti cənab İlham Əliyevin xüsusi diqqət və qayğısı ilə reallaşdırılan “Lənkəran şəhərinin su təchizatı və kanalizasiya sisteminin yaradılması” layihəsi çərçivəsində genişmiqyaslı tikinti-quraşdırma işləri artıq fəal fazaya qədəm qoyub.
Lənkəran Şəhər İcra Hakimiyyətinin (ŞİH) başçısı Taleh Qaraşov sentyabrın 3-də Hənifə Abdullayev küçəsində aparılan mühəndis-kommunikasiya işlərinin cari vəziyyəti ilə tanış olub. Prosesin gedişatı ilə maraqlanan ŞİH başçısı, işlərin keyfiyyətlə və qrafikə uyğun tamamlanması üçün məsul şəxslərə tapşırıq və tövsiyələrini verib.
Podratçı təşkilatın texniki hesabatına əsasən, fəaliyyət planına mövcud asfalt örtüyünün kəsilərək daşınması, müxtəlif kateqoriyalı qruntların qazılması və yararsız torpağın ərazidən kənarlaşdırılması daxildir. Həmçinin çarpazlaşan kommunikasiya xətlərinin təhlükəsiz köçürülməsi, bərpası və yeraltı infrastruktur yeniləndikdən dərhal sonra yolun yenidən asfaltlanması nəzərdə tutulur.
Qeyd edək ki, bu irimiqyaslı infrastruktur layihəsinin tamamlanması rayonun ekoloji təhlükəsizliyinə, əhalinin sanitariya-gigiyenik yaşayış standartlarının yüksəldilməsinə və sosial-iqtisadi inkişafın sürətlənməsinə xidmət edəcək. Tikinti prosesinin yarada biləcəyi müvəqqəti logistik və məişət çətinliklərinin şəhərin müasir ekosisteminə keçid mərhələsi olduğunu nəzərə alaraq, sakinlərdən anlayış və təmkin nümayiş etdirmələri xahiş olunur.
Yerli sakinlər tərəfindən böyük rəğbətlə qarşılanan bu xidməti islahatlara görə vətəndaşlar çoxsaylı müraciətlərində cənab Prezident İlham Əliyevə və Birinci vitse-prezident Mehriban xanım Əliyevaya dərin minnətdarlıqlarını ifadə edirlər.
