Nərimanabad qəsəbəsinin sakinləri Taleh Qaraşovun qəbul-görüşündən razı qaldılar
İnsanları narahat edən məsələlərin həllinə həssaslıqla yanaşılması, dövlətlə vətəndaş arasındakı qarşılıqlı etimad mühitinin güclənməsi və birbaşa dialoqun təmin olunması üçün yerlərdə həyata keçirilən səyyar qəbul-görüşlər xüsusi əhəmiyyətə malikdir. Lənkəran ŞİH-nin başçısı Taleh Qaraşovun təqvim planına uyğun olaraq sentyabrın 28-də Nərimanabad qəsəbəsində vətəndaşlarla keçirdiyi səyyar qəbul-görüş də məhz yuxarıda sadalanan məqsədlərə xidmət edib. Icra başçısı öncə Heydər Əliyev Fondu tərəfindən tikilən Nərimanabad qəsəbə tam orta məktəbinin həyətində şəhidlərin xatirəsinə inşa edilən kompleksin önünə gül dəstələri düzüb, şəhidlərimizə olan hörmət və ehtiramını ifadə edib. Səyyar qəbul-görüşdə İcra hakimiyyəti aparatının məsul şəxsləri, hüquq-mühafizə orqanlarının rəhbərləri, əlaqədar təşkilatların və xidmət sahələrinin nümayəndələri də iştirak ediblər. Vətənimizin azadlığı uğrunda canından keçən qəhrəman şəhidlərimizin xatirəsinin bir dəqiqəlik sükutla yad olunduğu səyyar qəbul-görüşü giriş sözü ilə Taleh Qaraşov açıb. İcra başçısı ənənəsinə sadiq qalaraq ilk növbədə şəhid ailələri, qazilər və Vətən müharibəsi iştirakçılarının qayğı və problemlərini dinləyib, onları narahat edən məsələlərin həlli ilə bağlı yerindəcə tapşırıq və göstərişlərini verib. Dövlət başçısı cənab İlham Əliyevin “Azərbaycan vətəndaşları, bütün dünya azərbaycanlıları şəhidlərimizlə fəxr edirlər” fikrini xatırladan T.Qaraşov bildirib ki, şəhid ailələrinə, qazilərə və Vətən müharibəsi iştirakçılarına qayğıyla yanaşmaq hər bir vətəndaşın və eləcə də dövlət məmurlarının borcudur. Natiq qeyd edib ki, cənab Prezident İlham Əliyev və Birinci vitse-prezident Mehriban xanım Əliyeva sözügedən məsələyə xüsusi diqqət və nəzarət edirlər, məhz bu həssaslıq nəticəsində istər şəhid ailələrinin məişət problemlərinin həlli, istər qazilərin sağlamlığının müalicə və bərpası, istərsə də Vətən müharibəsi iştirakçılarının işlə təmin edilməsi məsələsi hər zaman aktuallığını qoruyur.
Səyyar qəbul-görüşdə qəsəbə ictimaiyyətini narahat edən və icra hakimiyyətinin səlahiyyətlərinə aid olan bütün məsələlər yerində həllini tapıb, digər məsələlərin həlli üçün aidiyyəti qurumlara rəsmi müraciət edilib.
Yerli sakinlər fikir və istəklərini heç bir maneə olmadan rayon rəhbərliyinə çatdıra bildikləri üçün məmnunluqlarını ifadə ediblər. Qəsəbə sakinləri ərazidə Heydər Əliyev Fondunun dəstəyi ilə tikilən yeni məktəb binasına görə dövlət başçısı cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə ediblər.
