Lənkəran ŞİH başçısı Nərimanabad qəsəbəsinin sakinləri ilə səyyar görüş-qəbul keçirib
Oktyabrın 23-də Lənkəran Şəhər İcra Hakimiyyətinin (ŞİH) başçısı Taleh Qaraşov rayonun hüquq-mühafizə orqanlarının, eləcə də aidiyyəti idarə və müəssisələrin nümayəndələrinin iştirakı ilə Nərimanabad qəsəbə sakinləri ilə növbəti səyyar görüş-qəbulunu keçirib.
Görüşün əvvəlində icra başçısı əvvəlki qəbulda qaldırılmış məsələlərin icra vəziyyəti barədə sakinlərə ətraflı məlumat verib. Bildirilib ki, dövlət siyasətinin mərkəzində dayanan vətəndaş amili rayon rəhbərliyinin fəaliyyətinin əsas meyarıdır. Xüsusilə əhalinin həssas təbəqəsindən olan vətəndaşların qayğıları fərdi qaydada dinlənilir, yerli icra hakimiyyətinin səlahiyyətlərinə aid olan müraciətlər operativ şəkildə yerindəcə həllini tapır. Digər regional və respublika əhəmiyyətli məsələlərin həlli məqsədilə yuxarı dövlət qurumlarına rəsmi müraciətlərin ünvanlanması üçün məsul şəxslərə konkret tapşırıqlar verilir.
Görüşdə regionların sosial-iqtisadi inkişafı kontekstində Nərimanabad qəsəbəsinin mövcud potensialı, xüsusilə kənd təsərrüfatının inkişafı məsələləri geniş müzakirə olunub. Taleh Qaraşov rayonda aqrar sektorun şaxələndirilməsi, Nərimanabad qəsəbəsinin sakinləri üçün ənənəvi və əsas məşğulluq sahələrindən olan balıqçılığın inkişafı və müasir akvakultura (balıq yetişdirilməsi) təsərrüfatlarının yaradılması potensialını xüsusi vurğulayıb. Həmçinin sitrusçuluq, çayçılıq və çəltikçiliyin ənənəvi şöhrətinin qaytarılması, yerli məhsuldarlığın artırılması və fermerlərə dəstək mexanizmlərinin gücləndirilməsi istiqamətində görülən işləri diqqətə çatdırıb.
İcra başçısı çıxışında müasir dövrün çağırışlarına uyğun olaraq idarəçilikdə rəqəmsallaşmanın (elektron xidmətlərin) tətbiqinin önəmini də vurğulayıb. Bildirilib ki, vətəndaş müraciətlərinə baxılması, dövlət xidmətlərinin rəqəmsal platformalar üzərindən həyata keçirilməsi operativliyi artırır, şəffaflığı təmin edir və bürokratik əngəlləri aradan qaldırır.
Qəbulda səmimi dialoq şəraitində öz fikir və təkliflərini maneəsiz şəkildə rayon rəhbərliyinə çatdıran qəsəbə sakinləri göstərilən diqqət və qayğıdan məmnunluqlarını ifadə ediblər. Yerli insanlar vətəndaş-məmur münasibətlərində şəffaflığın artırılmasına, regionların sürətli sosial-iqtisadi tərəqqisinə, aqrar islahatlara və rəqəmsal yeniliklərə görə cənab Prezident İlham Əliyevə və Birinci vitse-prezident Mehriban xanım Əliyevaya dərin minnətdarlıqlarını bildiriblər.
