Lənkəranda daha bir yaşayış məntəqəsinə qaz verilib

Sentyabrın 11-də Azərbaycan Dövlət Neft Şirkətinin (SOCAR) “Azəriqaz” İstehsalat Birliyi (İB) tərəfindən Lənkəran rayonunun Haftoni qəsəbəsinə ilk dəfə təbii qaz verilib. Bu münasibətlə keçirilən mərasimdə Lənkəran Şəhər İcra Hakimiyyətinin (ŞİH), “Azəriqaz” İB-nin təmsilçiləri, ictimaiyyət nümayəndələri və yerli sakinlər iştirak ediblər.
      Tədbirdə çıxış edən İcra başçısı Taleh Qaraşov əlamətdar hadisə münasibəti ilə qəsəbə sakinlərini təbrik edərək, son illər ölkənin hər yerində qaz təchizatı sisteminin yenidən qurulması, kənd və qəsəbələrin qazlaşdırılması istiqamətində görülmüş məqsədyönlü tədbirlərdən danışıb. Azərbaycan Respublikasının Prezidenti cənab İlham Əliyevin ölkənin qazlaşdırılması proqramının icrasını daim diqqət mərkəzində saxladığını bildirən natiq bu sahədə həyata keçirilən işlərin bundan sonra da davam etdiriləcəyini vurğulayıb.
      Mərasimdə çıxış edən yerli sakinlər onların mənzillərinə təbii qazın verilməsinə, eyni zamanda qəsəbədə dünya standartlarına uyğun “İstisu” sanatoriyasının tikintisinə və qəsəbə yolunun asfaltlaşdırılmasına görə Azərbaycan Respublikasının Prezidenti cənab İlham Əliyevə minnətdarlıqlarını çatdırıblar.
      Bildirilib ki, qəsəbədə evlərin qazlaşdırılması üçün birpilləli sistem əsasında müxtəlif diametrli polietilen və metal borularla daşıyıcı, eləcə də məhəllədaxili qaz xətləri çəkilib, ümumilikdə 612 ailə üçün sayğac və fərdi tənzimləyici quraşdırılıb.
        Yaşayış məntəqəsinə təbii qazın verilməsini bildirən rəmzi məşəl alovlandırıldıqdan sonra İcra başçısı T.Qaraşov yerli sakinlərdən birinin mənzilinə baş çəkərək ev sahibini təbrik edib.