LƏNKƏRANDA “YERLİ DEMOKRATİYA HƏFTƏSİ” ÇƏRÇİVƏSİNDƏ DƏYİRMİ MASA TƏŞKİL OLUNDU
Noyabrın 25-dən dekabrın 1-dək Azərbaycanda “Yerli demokratiya həftəsi” keçirilir. Həftəlik çərçivəsində respublikamızın hər yerində olduğu kimi, Lənkəranda da müxtəlif tədbirlər düzənlənir.
Noyabrın 28-də həftəlik çərçivəsində Lənkəran şəhər Gənclər Evində dəyirmi masa keçirildi.
Dəyirmi masa “Gənclərin yerli əhəmiyyətli məsələlərin həllində vətəndaş fəallığının artırılması” mövzusuna həsr olunmuşdu.
Dəyirmi masanı giriş sözü ilə açan Lənkəran şəhər bələdiyyəsinin sədri Eldar Hüseynov yerli demokratiya həftəsi ilə əlaqədar tədbirlər planı haqqında məlumat verdi.
Tədbirdə iştirak edən Azərbaycan Respublikası Şəhər Bələdiyyələrinin Milli Assosiasiyasının nümayəndəsi Vüsal Paşayev “Yerli demokratiya həftəsi”nin keçirilməsinin məqsədlərindən söz açdı.
Sonra Lənkəran şəhər bələdiyyəsi sədrinin birinci müavini Tağı Məmmədov “Gənclərin yerli əhəmiyyətli məsələlərin həllində vətəndaş fəallığının artırılmasında bələdiyyələrin rolu” mövzusunda məruzə etdi.
Dəyirmi masada iştirak edən Lənkəranın ali və orta ixtisas müəssisələrinin tələbələri tərəfindən bir sıra təkliflər irəli sürüldü və onları maraqlandıran suallar cavablandırıldı.
