İcra başçısı Mamusta kəndində səyyar qəbul keçirib

4 may 2019-cu il tarixdə Lənkəran Şəhər İcra Hakimiyyətinin başçısı Taleh Qaraşov rayonun Mamusta kəndində səyyar qəbul keçirib. Azərbaycan Respublikası Prezidenti Administrasiyasının regional idarəetmə və yerli özünüidarəetmə orqanları ilə iş şöbəsinin 5-ci sektorunun müdiri Dəyanət Abdullayevin, İcra aparatı rəsmilərinin, hüquq-mühafizə orqanları, təhsil, səhiyyə, mədəniyyət və xidmət idarələri rəhbərlərinin iştirakı ilə keçən qəbulda vətəndaşların müraciətləri dinlənilib, inzibati ərazi vahidliyinin inkişafı ilə bağlı təkliflərə münasibət bildirilib. ​​Qəbul zamanı sakinlər son illərdə Lənkəran şəhərinin və rayonun sosial-iqtisadi inkişafı sahəsində görülən işləri, xüsusilə Ələt-Astara-İran İslam Respublikası sərhəddi magistral avtomobil yolunun istifadəyə verilməsini və 11 min nəfər sakinin gündəlik istifadə etdiyi, uzun illər təmirsiz qalmış Hirkan-Mamusta-Siyavar kəndlərarası  avtomobil yolunun əsaslı təmirinə və asfaltlanmasına başlanılmasını yüksək dəyərləndirərək bu qayğıya görə ölkə Prezidentinə minnətdarlıqlarını ifadə ediblər. Sakinlər həyata keçirilən sosial-iqtisadi islahatların, icra olunan infrastruktur layihələrin onların maddi-məişət şəraitinin yaxşılaşdırdığını diqqətə çatdırıblar. Qeyd olunub ki, dövlətin qayğısını gündəlik olaraq hiss edən sakinlər fərdi təsərrüfatlarda, plantasiyalarda daha həvəslə işləyir, daha çox məhsul istehsal etməyə çalışır, maddi imkanlarını artırırlar. Kənddə təvəz, bostan bitkilərinin, çəltik, buğda, çay və sitrusun becərildiyi, heyvan və davarın sayının artdığı, arı ailələrinin çoxaldığı və keçən ildən başlayaraq baramanın yetişdirildiyi diqqətə çatdırılıb. İcra başçısı və Azərbaycan Respublikası Prezidenti Administrasiyasının regional idarəetmə və yerli özünüidarəetmə orqanları ilə iş şöbəsinin 5-ci sektorunun müdiri Dəyanət Abdullayev qəbul-görüşdə çıxış edib ölkə Prezidentinin əhalinin rifah-halının yaxşılaşdırılması istiqamətində həyata keçirdiyi uğurlu siyasəti barədə geniş məlumat veriblər. ​​​​​Qəbul-görüşün sonunda İcra başçısı sakinlər tərəfindən qaldırılan məsələlərin həllindən ötrü aidiyyəti məsul şəxslərə müvafiq tapşırıqlar verib.